(er cof am Elizabeth Coare)
O’r pant gwyliaist
nodau distaw defaid
ar ddalen werdd
a’u llwybrau yn llinellau’r erwydd.
O’r traeth cesglaist gerrig crynion
a’u caboli a’u farneisio’n dirluniau;
rhoddaist inni lond dwrn mewn powlen frau
o glai lliw pŵl gwyrddlas y môr.
Calondid yn dy wendid
oedd dyfodiad y gwenoliaid duon.
Darllenaist Homer am y tro olaf
tra medret weld yr anadlu
ac addoli’r duwiau drwy yfed gwin.
Pan ymadawodd y gwenoliaid duon
torrodd d’ysbryd gwydn trwy’r plisgyn.
© hawlfraint Mary Burdett-Jones 2023